ಕೆಲವೊಂದು ಆಹಾರ-ತರಕಾರಿಗಳು ಅಧರಕ್ಕೆ ಬಲು ಕಹಿ. ಆದರೆ ಇದನ್ನು ಸೇವಿಸಿದರೆ ಉದರ ಸಿಹಿಯಾಗುವುದಂತೂ ಖಂಡಿತ. ಆರೋಗ್ಯಕ್ಕೆ ಹೇರಳವಾದ ಪ್ರಯೋಜನಗಳನ್ನು ನೀಡುವ ಕೆಲವು ತರಕಾರಿಗಳ ರುಚಿ ಚೆನ್ನಾಗಿರುವುದಿಲ್ಲ. ಆದರೆ ಅವು ದೇಹಕ್ಕುಂಟುಮಾಡುವ ಉಪಕಾರ ಅಷ್ಟಿಷ್ಟಲ್ಲ. ಅಂತಹ ತರಕಾರಿಗಳಲ್ಲಿ ಹಾಗಲಕಾಯಿಯೂ ಒಂದು.
ಸಾಮಾನ್ಯವಾಗಿ ಮಾರುಕಟ್ಟೆಯಲ್ಲಿ ಎಲ್ಲಾ ಕಾಲದಲ್ಲಿಯೂ ಸಿಗುವ ಹಾಗಲಕಾಯಿ ಎಷ್ಟು ಉಪಯುಕ್ತ ಎನ್ನುವುದು ಸಾಧಾರಣವಾಗಿ ಎಲ್ಲರಿಗೂ ಗೊತ್ತಿರುವ ವಿಷಯ. ಆದರೆ ಇದನ್ನು ಸೇವಿಸಲು ಹಿಂದೆ ಮುಂದೆ ನೋಡುವವರೇ ಹೆಚ್ಚು. ಅದರ ಕಹಿಯಾದ ರುಚಿ ಬಹುತೇಕರಿಗೆ ಇಷ್ಟವಾಗುವುದಿಲ್ಲ. ಆದರೆ ಸಮೃದ್ಧವಾದ ವಿಟಮಿನ್ ಎ, ವಿಟಮಿನ್ ಸಿ, ಕಬ್ಬಿಣಾಂಶ, ಮ್ಯಾಗ್ನಿಶೀಯಂ, ಆಂಟಿ ಆಕ್ಸಿಡೆಂಟ್‌ಗಳನ್ನು ಹೊಂದಿರುವ ಹಾಗಲಕಾಯಿ ದೇಹದ ಆರೋಗ್ಯವನ್ನು ಕಾಪಾಡಿಕೊಳ್ಳುವಲ್ಲಿ ಮಹತ್ವದ ಪಾತ್ರವಹಿಸುತ್ತದೆ.
ಪಚನ ಕ್ರಿಯೆಗೆ ಸಹಕಾರಿ
ಕೆಲವೊಮ್ಮೆ ನಾವು ತಿಂದ ಆಹಾರ ನಮಗೆ ವಿವಿಧ ರೀತಿಯಲ್ಲಿ ಸಮಸ್ಯೆಯನ್ನು ಉಂಟುಮಾಡುತ್ತದೆ. ಸರಿಯಾಗಿ ಜೀರ್ಣವಾಗದೆ, ಹೊಟ್ಟೆ ನೋವು ಬರುವುದರೊಂದಿಗೆ ಹಸಿವೆಯಾಗದೇ ಇರುವಂತಹ ಸಮಸ್ಯೆಗಳು ಬರಬಹುದು. ಇದಕ್ಕೆಲ್ಲಾ ಹಾಗಲಕಾಯಿ ಅತ್ಯುತ್ತಮ ಪರಿಹಾರವಾಗಿದೆ. ಹಾಗಲಕಾಯಿಯ ಜ್ಯೂಸ್‌ ಅಥವಾ ಅದನ್ನು ಬೇಯಿಸಿ ಪಲ್ಯದ ರೀತಿಯಲ್ಲಿ ಮಾಡಿ ಸೇವನೆ ಮಾಡುವುದರಿಂದ ಜೀರ್ಣಕ್ರಿಯೆ ಉತ್ತಮವಾಗುತ್ತದೆ.
ಕಫ-ಪಿತ್ತ ನಿವಾರಕ
ಇದು ದೇಹದಲ್ಲಿನ ಕಫ ಮತ್ತು ಪಿತ್ತ ನಿವಾರಣೆಗೆ ಒಳ್ಳೆಯದು. ಹೀಗಾಗಿ ಅಡುಗೆಯಲ್ಲಿ ಹಾಗಲಕಾಯಿಯನ್ನು ಬಳಸುವುದು ಉತ್ತಮ. ಅನೇಕರು ಹಾಗಲಕಾಯಿ ದೇಹದ ಉಷ್ಣತೆಯನ್ನು ಹೆಚ್ಚು ಮಾಡುತ್ತದೆ ಎನ್ನುತ್ತಾರೆ. ಆದರೆ ಹಾಗಲಕಾಯಿ ಅನುಷ್ಣ ಗುಣವನ್ನು ಹೊಂದಿದೆ. ಅಂದರೆ ಅತೀ ಉಷ್ಣವೂ ಅಲ್ಲ, ಅತಿಯಾದ ತಂಪಿನ ಗುಣವೂ ಅಲ್ಲ. ಹೀಗಾಗಿ ಎಲ್ಲರೂ ಹಾಗಲಕಾಯಿಯನ್ನು ಸೇವನೆ ಮಾಡಬಹುದು.
ಚರ್ಮ ರಕ್ಷಕ
ಚರ್ಮಕ್ಕೆ ಸಂಬಂಧಿಸಿದ ಸಮಸ್ಯೆಗಳಾದ
ಸೋರಿಯಾಸಿಸ್‌, ಮೊಡವೆ, ಅಲರ್ಜಿಯಂತಹ ತೊಂದರೆಗಳಿಗೆ ಹಾಗಲಕಾಯಿ ಸೇವನೆ ರಾಮಬಾಣ ವಿದ್ದಂತೆ. ಹಾಗಲಕಾಯಿಯ ಸೇವನೆಯಿಂದ ರಕ್ತ ಶುದ್ಧಿಯಾಗುವುದರಿಂದ ಚರ್ಮಕ್ಕೆ ಸಂಬಂಧಿಸಿದ ಕಾಯಿಲೆಗಳನ್ನು ನಿವಾರಿಸಿಕೊಳ್ಳಲು ಇದೊಂದು ದಾರಿ.
ಇನ್ನು ಹಾಗಲಕಾಯಿಯಲ್ಲಿನ ಉರಿಯೂತದ ಗುಣಲಕ್ಷಣಗಳಿಂದಾಗಿ, ಇದು ಮೊಡವೆಗಳಿಗೆ ಚಿಕಿತ್ಸೆಯ ರೀತಿಯಲ್ಲಿ ಕೆಲಸ ಮಾಡುತ್ತದೆ.
ತೂಕ ಹಾಗೂ ಕೊಬ್ಬಿನ ಇಳಿಕೆಗೆ
ದೇಹದಲ್ಲಿನ ಅತಿಯಾದ ತೂಕ ಇಳಿಕೆಗೆ ಹಾಗಲಕಾಯಿ ಸಹಾಯ ಮಾಡುತ್ತದೆ. ದೇಹದಲ್ಲಿನ ಕೊಬ್ಬನ್ನು ಕರಗಿಸಿ ಹೊಸದಾಗಿ ಕೊಬ್ಬಿನ ಕೋಶಗಳ ರಚನೆ ಮತ್ತು ಬೆಳವಣಿಗೆಯನ್ನು ತಡೆಯುತ್ತದೆ. ಹೀಗಾಗಿ ಬೊಜ್ಜು ಕರಗಿಸಲು ಸಹಾಯ ಮಾಡುವ ಹಾಗಲಕಾಯಿ ಸ್ಥೂಲಕಾಯಕ್ಕೆ ಚಿಕಿತ್ಸೆ ನೀಡುವ ನೈಸರ್ಗಿಕ ಪದಾರ್ಥವೆಂದೇ ಹೇಳಬಹುದು.
ಮಧುಮೇಹಿಗಳಿಗೂ ಸ್ನೇಹಿತ
ಸಾಮಾನ್ಯವಾಗಿ ಸಕ್ಕರೆ ಕಾಯಿಲೆ ಇರುವವರು ತಮ್ಮ ಆಹಾರದಲ್ಲಿ ಇತಿಮಿತಿಯನ್ನು ಕಾಯ್ದುಕೊಳ್ಳುವುದು ತುಂಬಾ ಮುಖ್ಯವಾಗಿರುತ್ತದೆ. ಆದರೆ ಹಾಗಲಕಾಯಿ ಮಧುಮೇಹಿಗಳಿಗೂ ಪ್ರಯೋಜನಕಾರಿಯಾಗಿದೆ. ದೇಹದ ರಕ್ತದಲ್ಲಿನ ಸಕ್ಕರೆಯನ್ನು ಕಡಿಮೆ ಮಾಡಲು ಸಹಾಯ ಮಾಡುವ ಹಾಗಲಕಾಯಿಯು ಇನ್ಸುಲಿನ್‌ನಂತೆ ಕಾರ್ಯನಿರ್ವಹಿಸುವ ಗುಣವನ್ನು ಹೊಂದಿದೆ. ಜೀವಕೋಶಗಳಿಗೆ ಗ್ಲುಕೋಸನ್ನು ಪೂರೈಸುವ ಕೆಲಸ ಮಾಡುವುದರಿಂದ ದೇಹ ಸುಸ್ತಾಗದಂತೆಯೂ ತಡೆಯುತ್ತದೆ.
ಆದರೆ ಅತಿಯಾದ ಹಾಗಲಕಾಯಿಯ ಸೇವನೆ ಒಳ್ಳೆಯದಲ್ಲ. ವಾರದಲ್ಲಿ ಒಂದು ಅಥವಾ ಎರಡು ಬಾರಿ ನಿಶ್ಚಿಂತೆಯಿಂದ ಸೇವಿಸಬಹುದು.
ನಿಮಗೆ ಆರೋಗ್ಯದ ಟಿಪ್ಸ್ ಇಷ್ಟ ಆದ್ರೆ ಶೇರ್ ಮಾಡಿ
ಭಾರತ ಸಾರಥಿ ಕನ್ನಡ ದಿನಪತ್ರಿಕೆ ಸದಾ ನಿಮ್ಮೊಂದಿಗೆ