ಪ್ರತಿಯೊಬ್ಬ ವ್ಯಕ್ತಿಯ ಆರೋಗ್ಯದ ದೃಷ್ಟಿಯಿಂದ ನೋಡುವುದಾದರೆ ಕೆಲವೊಂದು ಆಹಾರ ಪದಾರ್ಥಗಳ ಸೇವನೆ ಅತ್ಯಗತ್ಯ. ಅದು ಕಾಳು, ಧಾನ್ಯ ಅಥವಾ ಒಣ ಬೀಜಗಳಾಗಿರಬಹುದು. ಇಲ್ಲವಾದರೆ ಹಸಿರೆಲೆ-ತರಕಾರಿ, ಹಣ್ಣು-ಹಂಪಲುಗಳೂ ಆಗಿರಬಹುದು. ಆದರೆ ಸಮಯ ಸಂದರ್ಭಗಳನ್ನು ನೋಡಿ ಇವುಗಳನ್ನು ಸೇವಿಸುವುದು ಉತ್ತಮ.
ಇಂತಹ ಉಪಯುಕ್ತ ಆಹಾರಗಳಲ್ಲಿ ಬಾದಾಮಿಯೂ ಒಂದು. ಬಾದಾಮಿ ಬೀಜಗಳಲ್ಲಿ ವಿಟಮಿನ್ ಇ, ನಾರಿನ ಅಂಶ, ಒಮೆಗಾ 3 ಫ್ಯಾಟಿ ಆಮ್ಲ, ಒಮೆಗಾ 6 ಫ್ಯಾಟಿ ಆಮ್ಲ, ಪ್ರೋಟೀನ್ ಅಂಶ ಇತ್ಯಾದಿಗಳು ಹೆಚ್ಚಾಗಿ ಕಂಡು ಬರುತ್ತದೆ.
ಇದರ ಜೊತೆಗೆ ಮ್ಯಾಂಗನೀಸ್ ಕೂಡ ಇರುವುದರಿಂದ ಮೂಳೆಗಳ ಜೊತೆಗೆ ರಕ್ತಸಂಚಾರವನ್ನು ವೃದ್ಧಿಸುವಲ್ಲಿ ಇದು ಸಹಕಾರಿ. ರಕ್ತದ ಒತ್ತಡ ಮತ್ತು ಸಕ್ಕರೆ ಕಾಯಿಲೆ ಇರುವವರಿಗೆ ಇವುಗಳಿಂದ ಹೆಚ್ಚಿನ ಉಪಯೋಗವಿದೆ.
ಮೈ ಕೈ ನೋವು ಮತ್ತು ನರನಾಡಿಗಳ ತೊಂದರೆಯೂ ಇದರಿಂದ ದೂರವಾಗಬಲ್ಲದು. ಇದನ್ನು ಹಾಗೆ ತಿನ್ನುವುದಕ್ಕಿಂತ ನೆನೆಹಾಕಿ ತಿನ್ನುವುದರಿಂದ ಹೆಚ್ಚು ಲಾಭವಿದೆ. ಆದರೆ ಇದನ್ನು ನೆನೆ ಹಾಕಲು ಕೂಡ ಸರಿಯಾದ ವಿಧಾನವಿದೆ.
ಒಂದು ಕಪ್ ನೀರು ತೆಗೆದುಕೊಂಡು ಅದರಲ್ಲಿ ಒಂದು ಹಿಡಿ ಬಾದಾಮಿ ಬೀಜಗಳನ್ನು ಹಾಕಿ ಆರರಿಂದ ಎಂಟು ಗಂಟೆಗಳ ಕಾಲ ನೆನೆಹಾಕಬೇಕು. ಮರುದಿನ ಬೆಳಗ್ಗೆ ಬಾದಾಮಿ ನೆನೆಹಾಕಿದ ನೀರನ್ನು ಹೊರಚೆಲ್ಲಿ ಬಾದಾಮಿ ಬೀಜಗಳನ್ನು ಸಿಪ್ಪೆ ಸುಲಿಯಬೇಕು. ನೀವು ಬೇಕಾದರೆ ಇವುಗಳನ್ನು ಒಂದು ಪ್ಲಾಸ್ಟಿಕ್ ಕಂಟೈನರ್ ನಲ್ಲಿ ಹಾಕಿ ಇಟ್ಟುಕೊಳ್ಳಬಹುದು.
ನೆನೆಸಿದ ಬಾದಾಮಿ ಬೀಜ ತಿನ್ನುವುದರಿಂದ ಇರುವ ಪ್ರಯೋಜನಗಳು
ಜೀರ್ಣಶಕ್ತಿಯ ವೃದ್ಧಿ ಆರೋಗ್ಯಕರವಾದ ಕೊಬ್ಬಿನ ಅಂಶ ಹೊಂದಿರುವ ನೆನೆಸಿದ ಬಾದಾಮಿ ಬೀಜಗಳು ದೇಹದಲ್ಲಿ ಜೀರ್ಣಶಕ್ತಿ ಸರಾಗವಾಗಿ ನಡೆಯಲು ಸಹಾಯ ಮಾಡುತ್ತದೆ. ಆರೋಗ್ಯಕರವಾದ ರೀತಿಯಲ್ಲಿ ನಾವು ಸೇವನೆ ಮಾಡಿದ ಆಹಾರ ಬಹಳ ಬೇಗನೆ ಜೀರ್ಣವಾಗುತ್ತದೆ.
ತೂಕ ನಿಯಂತ್ರಣ
ಬಾದಾಮಿ ಬೀಜಗಳನ್ನು ಸಂಜೆಯ ಸಮಯದಲ್ಲಿ ಸ್ನಾಕ್ಸ್ ರೀತಿಯಲ್ಲೂ ತಿನ್ನಬಹುದು. ಹೀಗೆ ತಿನ್ನುವುದರಿಂದ ಹೊಟ್ಟೆ ಹಸಿವು ನಿಯಂತ್ರಣವಾಗುತ್ತದೆ ಮತ್ತು ದೀರ್ಘಕಾಲದವರೆಗೆ ಏನಾದರೂ ತಿನ್ನಬೇಕು ಎನ್ನುವ ಬಯಕೆ ಇಲ್ಲವಾಗುತ್ತದೆ.
ಅಲ್ಲದೆ ಸುಲಭವಾಗಿ ದೇಹದ ತೂಕವನ್ನು ಕರಗಿಸುವ ಮೂಲಕ ಅಗತ್ಯವಿರುವವರಿಗೆ ಈ ರೀತಿಯಲ್ಲಿಯೂ ಬಾದಾಮಿ ಪ್ರಯೋಜನಕಾರಿ.
ಹೃದಯದ ಆರೋಗ್ಯಕ್ಕೆ ಉತ್ತಮ
ನೆನೆಸಿದ ಬಾದಾಮಿ ಬೀಜಗಳಲ್ಲಿ ದೇಹದ ಕೆಟ್ಟ ಕೊಬ್ಬಿನ ಅಂಶ ಅಥವಾ ಎಲ್ಡಿಎಲ್ ಪ್ರಮಾಣವನ್ನು ಕಡಿಮೆ ಮಾಡುವ ಗುಣವಿದೆ. ಇದೇ ಸಮಯದಲ್ಲಿ ನಿಮ್ಮ ರಕ್ತದಲ್ಲಿ ಒಳ್ಳೆಯ ಕೊಬ್ಬಿನ ಅಂಶ ಅಥವಾ ಹೆಚ್ ಡಿ ಎಲ್ ಹೆಚ್ಚಾಗುವಂತೆಯೂ ಮಾಡುತ್ತದೆ. ಹೀಗಾಗಿ ಹೃದಯದ ಆರೋಗ್ಯಕ್ಕೆ ಇದು ಬಹಳ ಒಳ್ಳೆಯದು.
ಹೇರಳವಾದ ಆಂಟಿಆಕ್ಸಿಡೆಂಟ್ ಅಂಶ
ಬಾದಾಮಿ ಬೀಜಗಳಲ್ಲಿ ಕಂಡುಬರುವ ವಿಟಮಿನ್ ಇ ಅಂಶ, ಅಪಾರ ಪ್ರಮಾಣದ ಆಂಟಿ ಆಕ್ಸಿಡೆಂಟ್ ಗುಣವನ್ನು ಹೊಂದಿರುವುದರಿಂದ ದೇಹದಲ್ಲಿ ಫ್ರೀ ರಾಡಿಕಲ್ ಅಂಶಗಳ ಹಾವಳಿ ಇರುವುದಿಲ್ಲ. ಇದು ವಯಸ್ಸಾಗುವಿಕೆ ಪ್ರಕ್ರಿಯೆಯನ್ನು ತಡೆದು ಉರಿಯೂತವನ್ನು ನಿವಾರಣೆ ಮಾಡುತ್ತದೆ.
ಇಷ್ಟೇ ಅಲ್ಲದೆ ಬಾದಾಮಿ ಬೀಜಗಳಿಂದ ಪ್ರಯೋಜನಗಳು ಇನ್ನೂ ಸಾಕಷ್ಟಿವೆ. ಬಾದಾಮಿ ಬೀಜಗಳಲ್ಲಿ ವಿಟಮಿನ್ b17 ಸಾಕಷ್ಟಿದೆ. ಇದು ಕ್ಯಾನ್ಸರ್ ಸಮಸ್ಯೆಯನ್ನು ಪರಿಹಾರ ಮಾಡುವಲ್ಲಿ ಕೆಲಸ ಮಾಡುತ್ತದೆ. ಏಕೆಂದರೆ ಬಾದಾಮಿ ಬೀಜಗಳಲ್ಲಿ ಹೆಚ್ಚಾಗಿ ಕಂಡು ಬರುವ ಫ್ಲೇವನಾಯ್ಡ್ ಬ್ರಹ್ಮಾಣ, ದೇಹದಲ್ಲಿ ಗಡ್ಡೆ ಉಂಟಾಗದಂತೆ ನೋಡಿಕೊಳ್ಳುತ್ತದೆ.
ಇದರ ಜೊತೆಗೆ ರಕ್ತದಲ್ಲಿ ಸಕ್ಕರೆ ಪ್ರಮಾಣವನ್ನು ನಿರ್ವಹಣೆ ಮಾಡುವ ಗುಣಗಳು ಇದರಲ್ಲಿದೆ. ರಕ್ತದೊತ್ತಡಕ್ಕೂ ಇದು ಪರಿಣಾಮಕಾರಿ. ಗರ್ಭಿಣಿ ಮಹಿಳೆಯರಿಗೆ ನೆನೆಸಿದ ಬಾದಾಮಿ ಬೀಜಗಳನ್ನು ಸೇವನೆ ಮಾಡಲು ಕೊಡುವುದರಿಂದ ಹುಟ್ಟುವ ಮಗುವಿಗೆ ಯಾವುದೇ ರೀತಿಯ ನ್ಯೂನತೆಗಳು ಇರುವುದಿಲ್ಲ.
ಜಾಹೀರಾತು ಮತ್ತು ಸುದ್ದಿ ಕಳುಹಿಸಲು ಸಂಪರ್ಕಿಸಿ
9740160669
ಭಾರತ ಸಾರಥಿ ಕನ್ನಡ ದಿನಪತ್ರಿಕೆ ಸದಾ ನಿಮ್ಮೊಂದಿಗೆ